Un tempu den outomatisashon nan tabata bende nos “software” semper komo “future proof”, kual ta nifiká resistente pa futuro. Pensando bon mi ta duda ku e promesa ei a wòrdu kumpli kuné. Mi tin di rekonosé frankamente ku e kos ei no ta prekupá mi tampoko.
Loke si ta fasiná mi ta kon hende por bira resistente pa futuro. Tin hinter un gama di téknikanan via kua bo por sòru pa bo serebro prosesá tur e informashon di sistema ku bo ta sinti bo mes bon i n'e mes momentu atendé efektivamente ku situashonnan ku presentá. E téknikanan aki no por prevení ku kosnan desagradabel ta sosodé den bo bida. E téknikanan ta sòru si pa bo por dil mas mihó i fásil ku e situashonnan. Bo sentimentu na promé lugá.
Hopi téknika por i ta atendé hopi ku lenguahe i ta parse hopi intelektual, pero tur kos ta drai rònt di e sentimentu. Bo por pensa aworakí asina positivo, pero si bo no ta sintibu bon ku esei, bo no tin nada na dje. Tin téknika ku ta siñabu pensa positivo ku bo ta bai sintibu bon tambe. Dor di e uzo positivo di lenguahe tin téknika ku tin bon efekto riba e subkonsiente. Dor di esaki bo subkonsiente ta mas apto, pa ora algu bai ménos bon den bo bida, pa hasi tur adaptashon nesesario pa sòru ku lo sigui mihó posibel i ku emoshonalmente bo por dil mihó kuné.
Solamente ku lesa e frasenan aki ta krese den bo subkonsiente e idea ku kambio positivo ta posibel. Nunka no pensa ku kosnan ta bai di “mal a peor” manera un amigu a kaba di bisami algun dia pasa. Ku un posishon asina bo ta mas mihó prepará riba loke sea ku ta bini. Asin'aki ta bira mas fásil pa mira mas habri na futuro. Algun hende tin miedu di lo deskonosí i nobo pa nan, pero si bo sa adelantá ku tambe ora di kontratempu (dròbèk, sla òf gòlpi) bo serebro ta sòru pa tur kos sigui bon ku bo, e ora ei futuro ta bira netamente un fuente yen sorpresa positivo kual bo por bira ansioso n'e.
