Si ta trata solushon pa problemanan bieu òf e kuminsamentu di un desaroyo nobo, tur kos ta kuminsá ku e promé paso. Den mi trabou diario mi ta bisa semper ku e parti mas difísil ta pa konvensé hende ku nan mester di ayudo. Hasta ora mi palabrá ku amigunan pa bai di parandiá, un ora promé mi tin un sentimentu tierno di “mi keda mi kas dushi di mi?”
Aparentemente kada aktividat ku bo ta na punto pa hasi tin un sorto di opstákulo. Tin biaha e ta haltu tin biaha e ta mas abou. Ma siña mi mes pa super’é anto bai hasi loke ma proponé pa hasi tòg. Naturalmente ta trata na final kon bo ta sinti bo mes i no ta na nodi pa bai hasi kosnan kontra bo boluntat. Mayoria biaha mi sa si ku despues lo mi haña pleizi den mi trabou òf den otro kosnan ku lo mi a bai hasi. Mayoria hende ta haña ku mi ta hopi produktivo den mi trabou anto esei tin di haber ku e hecho ku mi ta dal e promé paso fásilmente den loke mi mester hasi. Ántes mi ta tin problema grandi ku por ehèmpel limpia kas, awendia mi ta kuminsá gewon. Sin mi sa mi a kaba. Bon limpiamentu di kas ta un ehèmpel simpel pero bo por apliká e mes un mekanismo den diferente parti di bo bida.
Loke ta hasié fásil, ta mi kapasidat pa dirigí mi sentido den e direkshon korekto. Ku tempu bo por haña grep riba kiko bo ta sinti anto “a la fin” ta esei ta tur e kos. Pa sintibu bon ku loke bo ta hasi anto ku e aktitut ei ta hopi mas fásil pa drenta akshon.
Mayoria hende no tin un bon sentimentu despues di un anochi wak televishon anto nan ta bai drumi numa. Pero hende ku dediká tempu na algu produktivo manera lesa, skirbi poesia, pinta òf ki ku ta, ta haña un bon sentimentu fo'i dje. Mas ku esei. E sorto di proseso kreativo nan ei ta sòru ku bo serebro kue kaminda nobo i haña fásilmente solushon nobo kreativo pa otro kaso den bo bida. Pues tur kos ta kuminsá ku e promé paso.
