E tópiko di e siman aki ta pa sa kon bo por formulá meta, di sistema ku bo tin chèns grandi, pa realisá esakinan realmente. Tambe pasobra e temporada pa plania bon intenshon ta den kurpa.
Importante den esaki ta pa bo visualisá bo metanan i bon intenshon. Un meta formulá riba papel ta muchu limitá. Un imágen no tin límite i ta bisa mas ku mil palabra. Imaginábu kon bo bida lo ta na momentu ku bo realisá bo meta. Dor di imaginábu kiko i kon bo ta visualisá esaki bo ta bisa bo supkonsiente kiko ta e intenshon. Di e sistema ei bo metanan konsiente i inkonsiente ta riba un liña i bo ta bai realisá bo metanan pa 100% di e tempu. Afortunadamente pa gran parti inkonsiente asina ei bo por disfrutá na un manera relahá di e momentunan bunita di bida sin ku bo ta sinta frustra bo mes hinter dia riba loke bo no a realisá ainda. Visualisá un imágen kla di bo intenshon i despues lubid’é.
Tambe ta di importansha pa bo sòru di proponébu kosnan ku bo mes por realisá. En bes di imaginábu ta gana e premio mayó di brièchi, lo ta sensato pa mira bo mes kon bo ta desaroyá i riba bo mes forsa bo ta realisá loke bo kier. Sòru pa ta kla pa bo mes kiko bo ta eksperensha, kiko bo ta wak, sinti i tende na momentu ku bo ta realisá bo meta. Si esaki no ta kla pa bo, por ta e kaso ku bo a realisá bo meta kaba, pero ku bo no ta konsiente di esei.
Pa klousura ta sensato pa kontrolá si en realidat ta bai mihó ku bo na momentu ku bo realisá bo meta, ku bo ta keda safe i ku bo no ta tuma rísiko grandi. Meskos ta konta pa bo famia i ser nan kerí. Despues di esei ta sigui eventualmente e organisashon pa kual bo ta traha i e komunidat. Pero tòg prinsipalmente bo mes i bo ser nan kerí. Lo ta ideal pa hinter mundu bai dilanti ora bo realisá bo metanan, pero si ta trata solamente bo mes mundu, e ora ei tambe ta bon.
Kòrtiku i konkreto: Hasi di kada dia e mihó dia di aña. Sea gradisidu tur dia di nobo pa loke bo tin. Mi ta deseábu un 2009 FABULOSO!
Imo.
