INFORMASHON GENERAL
Bandera ta un instrumento pa identifiká un teritorio komo pais i òf parti di un pais. Bandera, huntu ku eskudo i himno ta forma símbolo di un pais. Punto di salida klave ta ku kada hende ku stima su pais ta honra su bandera i tambe bandera di otro pueblonan komo símbolo di mas haltu di un pais.
Orígen di Bandera di Kòrsou
Na aña 1984, Konseho Insular di Kòrsou a skohe for di e mil shete shen (1700) diseño ku a drenta, e aktual bandera. E diseñadó di Bandera di Kòrsou ta señor Martin den Dulk. Riba 2 di yüli 1984, Diputado di Enseñansa i Kultura, ing. W.M. Franco (†), tabatin e honor di hisa pa promé biaha Bandera di Kòrsou p’asina inougurá “Dia di Bandera” ofisialmente, pues 25 aña pasá Kòrsou a introdusí Su Bandera.
Kolónan
E koló blou di e bandera di Kòrsou ta ultramarino (Pantone 280) i e koló hel ta hel lamunchi (Pantone 102). E faha mas ariba ta simbolisá nos shelu, e faha mas abou ta simbolisá e laman ku ta rondoná Kòrsou. E koló blou ta simbolisá fieldat di nos pueblo. E faha hel ta simbolisá nos solo skèrpi i e karakter alegre di nos pueblo.
E sinku puntanan di e streanan ta simbolisá e sinku kontinentenan di unda e diferente gruponan di poblashon di Kòrsou a sali. Strea ta símbolo di konfiansa, speransa i espektativa. E koló blanku di e streanan ta simbolisá pas i felisidat ku nos tur ta aspirá.
Pa evitá mal uso di Bandera di Kòrsou (meskos ku tur pais), Kòrsou tambe a stipulá algun regla na 1984.
