2.

1.Bo subkonsiente no ta komprondé nò! pero...

Na promé lugá danki pa tur e bon deseonan pa ku e aña nobo!

Bo sub-konsiente no ta komprondé nò, pero … Kon nos serebro ta interpretá e palabra “nò”. Si un persona ta den problema regularmente e ta haña konseho di amigu, famia y konosínan. E konseho nan aki mayoria biaha ta mal fórmula di sistema ku un hende, ku ta sinti su mes malu kaba, ta bai sinti mas malu. Naturalmente tur hende tin tur bon intenshon ku un hende ku ta den problema, pero dor di trese un mensahe positivo ku e palabranan robes, kontrali lo ser realisá.

Un ehèmpel ku mi ta tende regularmente ta: “No preokupábu, ta ménos mal”. Nos serebro tin problema pa komprondé e palabra “nò”. No pensa riba karnaval. Awor ku mi ta menshoná esei diripiente el a bira un tiki mas difísil. Ku esaki un hende ta tende den e ehèmpel ariba menshoná “preokupábu, paso kos ta malu” òf “Pensa riba karnaval”. Mal manera pa konsolá un hende.

Bo por usa e palabra “nò” positivamente tambe. Loke por resultá bon ta pa, na lugá di suprayá e situashon difísil den kual un hende ta haña su mes, hustamente pa suprayá e falta di e positivo. Bo por hasi esaki ku un frase manera: “Esaki no ta e periodo mas mihó den bo bida” òf “Aworakí no ta e mihó momentu pa sigui ku bo bida, pero un dia e momento lo yega si”.

Den e último ehèmpel ma usa e palabra “pero” despues di a kontradesí e positivo. Mal trainer nan ta siña hende pa no usa e palabra “pero”. Ami ta puntra mi mes semper “Pero dikon nò?”. Bo por usa “pero” pa tumba e loke bo a bisa anteriormente. E konsekuensha ta ku bo ta rechasá pa refutá e positivo. Ku esaki bo ta haña un mensahe dòbel positivo pa sostené un hende mihó.



.. mi ta bai drumi ...

12. Sugerensha positivo pa 2012

Ningun hende no por pronostiká destino y maske ku 2012 no ta mustra masha bon, ta importante pa tene bon kla bo dilanti kon bon nos tin’e aki na Kòrsou. Pues p’esei mi speransa pa 2012 ta na promé lugá, ku kos lo bai mihó na paisnan den terser mundu y ku nan por hasi uso di e periodo difísil den Oksidente, pa logra konkista un mihó lugá den e mundu aki.

Tambe pa abo personalmente mi ta spera ku 2012 lo bira un aña mihó ku bo mes por imaginá, ta posibel. Primeramente ta di sumo importansha ku bo salú ta bon, òf pa esnan ku tin nesesidat di mihó salú, ku di manera ineksplikabel (òf djis ku bon yudansa) lo bai mihó den 2012. Tambe riba tereno di amor, mi ta spera ku den 2012 lo bo ta huntu ku un persona ku ta nifiká hopi pa bo y abo pe. Si esei no ta e kaso ainda, ku lo bo topa e persona ei den 2012. Ohalá boso por hasi uso di 2012 pa laga otro sa kuantu boso stima otro, kon ameno bo ta eksperensha su presensha den bo bida y kuantu boso ta respetá otro. A ser demostrá ku relashon nan, den kual bo ta hasi esaki repetidamente, ta perdura. Opviamente tur e kalor y energia aki ta intenshoná tambe pa eventual muchanan, famia y ser nan kerí den bo ambiente direkto.

Por lo demas mi ta spera ku 2012 lo hibabu un paso mas serka di e metanan ku bo kier realisá. Mi idea di realisá metanan, ta unu den kual bo ta konfia bo sub-konsiente pa hasi e bon eskoho nan y pa dirigíbu den e direkshon korekto tanten ku bo ta gosa konsientemente di bida. Kisas esaki ta nifiká ku lo bo mantené loke bo tin den 2012. E por ta djis tambe ku sirkunstansha ku ta kambia, ta trese ku bo ta haña mas posibilidat pa hasi loke bo kurason y pashon en realidat ke. En todo kaso mi ta deseá abo y bo ser nan kerí de lo mehor pa aña 2012.

1. Ayo tur bon intenshon

Tradishonalmente desèmber tin e signo di festehá y sera aña. Aparentemente tur sorto di bon intenshon ta pèrtenesé na esei. Opviamente esei no ta bo propio idea. Media, bo ser nan serka di bo y kisas bo mes desapuntenan ta imponé esei riba bo. Aki mi tin algun pregunta: Ta e momentu apropiá? Y: Bon intenshon ta un idea sensato?

Desèmber ta un periodo di agitashon enorme. Na trabou mester kaba pura ku yen tarea. Asina bo sera porta di trabou tras di bo lomba ta sigui e atake riba pakusnan. Bo ser nan kerí tin e pensamentu ku nan tin derecho riba regalito nan útil. Kasi bo ta bringa ku otro klientenan pa e último pañanan di marka y bo ta yega kas ku tasnan ku un hende mentalmente normal nunka lo no pensa pa yega kas kuné.

Despues di ku bo kaba ku regalo ta sigui e atake riba e supermerkado. Purapura bo ta kore ranka e delaster pan di Pasku for riba rèki. E pa kiko bo no sa ku eksaktitut, pero pa un òf otro motibu siniestro, diripiente bo tin gana den kuminda kompletamente fout manera sùlt. Esei tras di lomba bo no ta ni mitar di kaminda. Mester kumpra palu di Pasku y mester dòrna esaki. Un di e miembro nan di famia predilekto ta ser apuntá pa para oranan den kushina y pa korona e obra tin un fiestin obligatorio ku famianan iritante òf kisas no. No lubidá riba tur e bibida y tur e kuminda. Kue esaki e drama ta kompletu.

Ami bo no ta bin gana ku ta un bon momentu, ora bo ta mal kome ku doló di stoma benta riba un banki, ta kibra bo kabes bashí enkuanto bon intenshon? Bo kurpa mester di e sanger na otro lugá ku no ta bo serebro. Pa ser korto: filosofia tokante di pasado, presente y futuro bo por bien posponé te na e momentu ku bo bida ta mas trankil.

Ta asina malu kos ta? Mi ta kere ku ta ménos mal. No preokupábu tantu pa bo salu. Sende un sigaria. Aparentemente humamentu ta hasi bo bida algun aña mas kòrtiku, e último añanan no ta esnan mas ameno di bo bida. Pues … Dal un drinks mas y tur sorto di kuminda malu pa salu, kual ta asina dushi pa kome. Biba! Aparentemente pleizi ta algarga bo bida. Pues hocha kos malu pa salu y tin pleizi ta nivelá otro. Asina simpel e kos ta.

Un otro punto kaminda nos ta kibuká nos mes totalmente ta e kalkulashon nan ku nos ta hasi di pasado y futuro. Eksperimentunan a ser hasi den kual ta puntra hende pa imaginá pasado. Esei ta logra basta bon. Nan ta pasa e tèst na momentu di trese deskripshon nan konkreto. Asina bo pidi nan pa hasi e meskos pa futuro ta bira hinter un otro kos tur konfuso. E konfushon ei ta e motibu pa kiko bon intenshon nan ta faya. Ademas nos ta regularmente muchu optimista enkuanto nos posibilidatnan.

Mi ta spera ku mi a dunabu sufisiente argumentu dikon bon intenshon ta un ehersisio kompletamente sin sentido, sigur den e tempu aki. Pues mi tin solamente un konseho pa bo: tira bo mes den e alboroto di fiesta. Usa e dianan di fiesta pa gosa sin bèrgwensa di bida! Pasa dushi dianan di fiesta y bon aña.

PS: Esaki tin un bentaha derivá: niun desapunte fin di 2011, pasobra bo no a krea espektativanan eksaherá.

11. Konfiansa den bo mes

Algu importante pa bo tin ta konfiansa den bo mes. Ta trata propio eksperensha individual. Bo no tin nada na konosementu ophetivo di hende. Ta trata loke abo ta eksperensha y pasa den. Ora bo tuma bo mes komo punto di salida, ta importante pa bo tribi di konfia den bo mes.

Hopi di ken nos ta, kiko nos ta haña y kiko nos ta hasi, ta sali for di nos inkonsiente. E inkonsiente aki ta e parti primitivo di nos serebro ku su intenshon ta pa sòru pa nos sobrebibí. E inkonsiente no ta wòri, si esei mester bai den kombinashon ku pensamentu negativo, tanten bo sobreviví. Siña tende bon di bo inkonsiente ta un paso importante pa haña mas konfiansa den bo mes. Asina bo kapta mas señal inkonsiente y sa di intérpretenan bon, bo a haña un bon kompañero ku lo sòru pa bo bida lo bira un tiki mas fásil.

Loke ta hasi e komunikashon entre abo y bo inkonsiente mas fuerte, ta pa bo sinti y ekspresá balorashon, rèspèt y gratitut pa bo inkonsiente. Ta asina ku, tanten e inkonsiente ta hasi su trabou, e ta haña ameno pa ser balorá de bes en kuando pa tur e trabou ku e ta hasi pa bo. Di e sistema ei no solamente bo ta haña mas konfiansa den bo mes pero bo ta bai konfia bo mes mas tambe.

10. Kon importante amor ta?

Den literatura bo ta lesa ku amor no ta eksistí.... En realidat kon importante amor ta? Ora nos bisa ku nos ta duna un hende amor, e loke nos ta duna hende no ta nada físikamente eksistente. Loke nos ke bisa ta ku nos ta sinti amor pa un hende. Ku nos ta yena di bon sentimentu y kalor ora nos ta huntu ku e persona.

Pa nos haña un bon pareha ta mas difísil ku hopi hende ta pensa. Speshalmente pa hende speshal manera ami ku abo. Mayoria hende ta kontentu lihé ku un hende ku nan topa. Hopi biaha e otro no ta rechasá sufisiente y ta kuminsá un relashon. No ta nada straño ku hopi relashon ta kibra. Ta mihó bo ta super kritiko y den desapunte bo despedí di un pareha potensial. Òf kontrali sea kontentu ku un hende rechasá bu. Sea kontentu ku bo a skapa di un relashon infelis.

E dia ku bo logra topa bo pareha ideal, ta importante pa sigurá bo mes di ku boso lo permanesé uni. Investigashon a demostrá ku bo ta alkansá hopi dor di ta kariñoso frekuentemente. Ora ku bo bisa otro hinter dia ku boso ta stima otro y respetá otro: ta kompartí kalor, amor y energia y laga otro sa ku bo ta gusta di ta den su kompania, despues di tempu, boso sub-konsiente tambe ta kuminsá kere. Y esei ta sòru pa boso ku konfiansa ta keda stima otro.

9. Realisá bo meta na un manera mágiko

Ken lo no ke esei? Un píldora mágiko ku ta resolvé tur kos òf un método ku ta tover tur kos ku bo ke. E realidat ta ku tuma responsabilidat y tuma akshon pa sòru pa bo haña loke bo ta deseá y soña ta funshoná muchu mihó ku buska y warda riba un píldora mágiko. Esei no ta nifiká ku den un biaha bo ta resolvé tur kos. Métodonan ku ta sugerí ku e solo pensamentu tur kos ta kai fo'i shelu, ta sòru pa hende atraé frustrashon. Tuma inisiativa, tuma responsabilidat pa sòru ku bo ta siña tur kos ku ta nesesario pa alkansá un bon resultado ta funshoná mihó.

Sinembargo tin kosnan ku bo por hasi loke ta oumentá e probabilidat ku bo soñonan y deseonan ta bira realidat. Asina, un gran parti di loke nos ta pensa, hasi y sinti ta ser dirigí pa nos sub-konsiente. Investigashon resien ta mustra e posibilidat pa ku ser nan humano realmente tin un boluntat liber, teniendo kuenta ku eksperensha di kada dia, ta bastante chikí. Promé ku esei, e hòmber ta un kriatura ku ta dirigí su mes riba un imágen determiná di futuro. Tin biaha inkonsientemente e imágen aki ta ser formá den tempunan den kual nos no tabata apto pa forma imágen nan di futuro korektamente. Pues ta prudente pa adaptá de bes en kuando e espektativanan di futuro yu soñonan y deseonan aktual.

Tambe ta konsehabel pa formulá deseo y soño den tèrmino di kua abilidat bo mester tin ora ku bo realisá bo futuro ku ba soña. Na lugá di imaginábu yen material un imágen di kon den futuro lo bo por ta apto di tin un mihó entrada, ta mas fuerte ku un imágen di un Ferari karu para dilanti porta. Sin bo sa, bo ta realisá ku ta e bisiña no ta tin mas lugá dilanti su porta anto el a stashoná su Ferari dilanti bo porta.

Por último ta importante pa laga e imágen nan di futuro aki sak den bo sub-kosientente. E mihó manera pa hasi esaki ta di lubidá e imágen nan. Pa bo soñonan bira realidat ta importante pa bo tuna e disishon nan korekto. Investigashon ta mustra ku ta mas mihó bo sub-konsiente tuma desishon nan kompliká pa bo konsiente. Awor ku bo sub-konsiente sa e intenshon ta bon pa bo konfia den esaki tambe. Tanten bo por gosa di e momentunan bunita di bo bida. Dor di trese e momentunan aki bek den bo bida ku mas frekuensha y gosa di nan intensamente anto ser sorpresa pa momentunan ku bo soñonan ta ser realisá tiki tiki.

8. E banda spiritual di sèn

Algun hende no gusta sèn. Nan ta hañ’é fis òf ordinario. Ami ta kere ku sèn ta fantástiko.
No komo método riba su mes pero komo indikadó di kon bon kos ta bai. Kisas paso mi a krese den añanan 80 ku Atari y Pacman, pero mi ta kompará sèn semper ku e skor banda drechi ariba den e pantaya. Mas mihó bo ta den e wega, mas nivel bo ta alkansá, mas haltu bo skor.

Mi ta sali for di e punto di bista ku bo ta gana kuater biaha mas tantu sèn ku bo ta risibí aworakí y tur esei pa dos biaha ménos trabou ku bo ta hasi aktualmente. Mihó bisa tur hende ta mal paga. Ta importante pa disponé di mas ku sufisiente sèn pasobra ku sèn bo por kumpra e kos di mas presioso ku ta eksistí y na benta na mundu kual ta: tempu!

Kada un di nos tin un tempu limitá riba e bunita planeta blou bèrdè aki. Pues p’esei ta mas ku lamentabel pa malusá e tempu limitá aki na kosnan robes. Manera por ehèmpel, sinti bo mes malu, buska guera, pleita òf na otro kos ku ta kitabu for di loke e ta trata primeramente: tin pleizi, dibertí y realisá e metanan den bo bida ku un kurason trankil. Si ta traha so bo ta traha hinter dia, sino bo no por paga bo debenan, tambe ta lamentabel. E ora ei ta tempu pa pensa na ki sistema bo por bai gana mas sèn.

Segun mi konsepto esei ta semper meskos: dor di mehorá bo abilidatnan y dor di siña abilidatnan nobo, bo ta sòru pa bo bira di mas balor pa bo doño di trabou pa ser paga. E diskushon di trabounan pisa semper ta keda sorprendé mi. Tin e ponensha ku un trahadó di kaya despues di e edat di 25 a kaba, anto no por traha mas. Pero lo bo ke traha kaya for di yòn te na bo behes? Na un dado momento lo bo ke siña un otro fishi tòg? Por ehèmpel di bira mènedjer di e trahadónan di kaya òf diseñadó di kaya?

Simplemente, sòru pa bo traha un plan pa bo mes den kua ta kla kon bo ta bai gana mas sèn. Sigurá bo mes ku den e plan ta menshoná kua abilidat bo ke desaroyá y kua abilidat nobo bo ke siña. Di e sistema ei bo ta gana tempu, dor di kual bo por desaroyá bo mes mihó, dor di kual bo ta gana mas tempu, y desaroyá bo mes mas etc.
Pa ami esei ta e banda spiritual di sèn.

7. Laf yu!

Laf yu! ta un di e títulonan mas straño di último lunanan. Prinsipalmente pa hendenan ku konosémi personalmente debí na ku mi estilo ta humorístiko, pleizi y relaha. Den esei mi ta di opinion ku laf ta meresé mas krédito ku e ta haña mayoria biaha. Ku esei mi kier men algu otro ku sintibu laf òf fèrfelá bo mes. Esei ta lamentabel pa bo tempu. Ta bon pa nos siña di tin mas momentu bunita den nos bida. Pa nos siña tambe di laga e momentunan bunita aki dura mas largu posibel. Anto pa nos siña, si akaso un biaha ta laf, den pensamentu bai bèk na momentunan bunita, pa pasa e tempu laf tòg na un manera ameno.

Mi ta tende suspiro kaba di mester bai siña un kos nobo. No! No ta esei mi kier men. Komo individual mi tin basta atenshon pa loke ta nobo. Por ehèmpel si tin algu den supermarket ku un etikèt riba dje ku ta bisa Nobo! Mi ta kumpr’é, maske mi sa ku mi no gust’é. Pero riba tereno di desaroyo personal, tin grep riba bo mes emoshon nan y usa bo serebro efektivamente pa un mihó bida, mi ta preferá enfoká riba laf ku nobo.

Mi sa haña e krítika ku hopi biaha mi ta hasi e mes kosnan. Y esei ta kuadra tambe. Mi ta preferá di bira mihó den un téknika básiko ku kada bes mi tin ku buska téknika nobo y kompliká kual den práktika nunka mi no ta usa. Mas ku klaro mi ta añadí idea nobo, kreatividat y e abilidat pa na un manera fleksibel pensa pa varia ora un téknika básiko un biaha no tin e éksito ku normalmente e tin.

Di e sistema ei mi ta haña tur loke mi mester pa biba mi bida manera ta destiná. Esaki mi ta hasi usando e deskonosí di mi serebro a lo máksimo y n'e mes momentu ta disponibel pa sostené, yuda anto dil mihó ku hende rondó di mi, na un manera optimal. Ku resultadonan asina mi ta preferá di ta laf ku no laf.

6. Dos manera pa komuniká

Tin diferente método pa komuniká. Segun mi nan ta dos. Unu ta dirigí riba kompartí informashon mas zùiver ku ta posibel. Esaki ta nifiká skucha bon na loke e otro ta bisa pa tende unda ta laga, drai òf generalisá informashon relevante. Pa despues usando preguntanan adekuá optené e informashon relevante.
Y naturalmente al reves pa bo mes sòru mas ménos posibel pa bo evitá di laga, drai òf generalisá informashon relevante.
Pa ser breve, skucha bon y usa e palabranan adekuá.

Den mi eksperensha e método di komunikashon aki un den dies kaso e ta utilisabel, a ménos ku bo ta den un ambiente hopi tékniko. Por ehèmpel pa hinka un nave espasial den otro informashon zùiver ta hopi importante. Pero den mayoria kaso e método aki ta mas importante. E di dos método ta dirigí pa influensha hende positivamente.

Awor tin sufisiente hende ku e solo palabra “influensha” pa nan ta horibel. Den mi vishon no tin nada malu na “influensha”. Ta dependé kiko bo ta realisá ku influensha. Hende ta bira malu òf infelis di dje e ora ei e ta fout, pero si hende ta haña un mihó bida di dje mi ta hañ’é tremendo. Mayoria hende ke kontesta riba e pregunta; “Kon mi ta sali for di mi problemanan?” Nan ta haña ideal pa ser influensha den kaso ku ta sòru pa eliminá nan problemanan.

E manera ku hende ta ser influensha ta den e forsa hipotétiko di palabra. Konsenshi di hende ta trankilisá den nan soño di sistema ku bo por komuniká ku e sub-konsiente na un manera mas direkto. Ta e kaso pa laga sufisiente espasio pa e sub-konsiente pa yena e detayenan pa e kuadra a lo máksimo ku e mundu di esun ku bo ta influensha. Di e sistema ei bo ta hasi e chèns ku e hende ta bai hasi loke bo ke mas grandi.
Siña di e dos métodonan di komunikashon aki mi ta haña un meta hopi importante ku kada ken mester realisá pa sòru ku nos ta dil mihó ku otro y lo yuda otro ku un bon sentimentu den amistat, trabou y komunidat.

5. E realidat spiritual

Tin biaha bo ta tende: “bo mes ta krea bo realidat”. Esei naturalmente no ta kuadra. Si, tin un realidat kual ta los for di nos. Si bo imaginábu ku bo ta krea bo mes realidat esei ta impliká e sugerensha ku tur kos por tanten bo por inventá esaki. Esei klaramente no ta kuadra. Bo por inventá ku awe sin ningun rekurso adishonal bo ta bai kana riba planeta Marte, pero maske ki’ bo hasi esei lo no sosodé. Lo ta hopi trabou si bo mes mester krea bo mes realidat. Afortunadamente ta eksistí un realidat ku ta duna nos input di sistema ku únikamente mester eksperensha loke tin.

Bo por tin e pregunta si nos por yega na sa e realidat. E kontesta riba e pregunta ei ta: “No, nos konosé e realidat solamente dor di loke nos sinku sentidonan ta kapta y nos serebro ta transformá e señalnan ei den nos eksperensha di realidat”. Bo ta ripara: pa un hende spiritual mi ta para ku dos pia riba tera. Ta e intenshon pa sòru pa bo tin un bida mas riku posibel. Esei ta nifiká ku bo mester dediká bo serebro a lo máksimo pa bo por gosa di e momentunan bunita ku realidat por ofresébu.

Den nos serebro tin diferente grupo di sélula kual ta ehekutá diferente funshon. Asina tin sélula ku ta sòru pa nos kombibí ku otro hende rondó di nos. Tin sélula ku ta sòru ku nos tin un bon sentimentu ora un hende trese un historia lógiko. Banda di tur e diferente funshon nan tin sélula tambe ku ta sòru pa nos tin eksperensha spiritual. Den mi vishon e sélula nan ei tabata impresindibel den e evolushon di konstrukshon di nos kultura. Despues di ku nos a surpasá un trupa di makaku, lo mester ta tin algu ku por a tene gruponan mas grandi huntu. Eksperenshanan spiritual a hasi posibel pa uni hende via di religion.

Awendia tin ménos nesesidat pa union pasobra awor tin otro método manera por ehèmpel estado òf komunidat. Den esei mi ta di opinion ku pa bo tin un bida mas riku posibel ta importante pa bo tin eksperenshanan spiritual. Na e manera ei bo por hasi uso di tur sélula ku bo tin y saka mas for di bida.

4. E importansha di relahashon

Tur hende ta di akuerdo: relahashon pa bon pa hende. Muchu hende ta stress di mas. Stress króniko ta un kousa di hopi malesa. Ta bon pa siña relahá. Esei por diferente manera. Kon ku bo haña bo relahashon, ta prudente pa sòru ku eventual stress òf tenshon disparsé. Generalmente ta difísil pa e serebro relahá den un biaha for di un situashon di tenshon. Ta mas fásil pa e serebro bai di un situashon di tenshon pa unu neutral y despues for di neutral buska relahashon.

Neutralisá tenshon bo ta realisá dor di mira kon bo ta eksperensha tenshon. Serka sierto hende e ta primario un sentimentu. Serka otro por ta e kaso ku nan ta prekupá nan mes pa imágen nan di pasado òf nan ta imaginá nan mes kalamidatnan den futuro. Y tambe otronan ta prinsipalmente drùk ku pensa, kual ta okashoná tenshon. Tin téknikanan òf kombinashon di téknika pa yega mas serka di e kondishon neutral.

Si bo realisá e kondishon neutral, e ora ei ta e kaso pa bo trese bek momentunan di relahashon di ántes. Por ta na un fiesta, karnaval, Pasku òf dushi bou di bo deken promé bo pega soño, kua momentu di bo preferensha, asina bo bai bek na e momentu relahá y bo imaginá bo mes ku esei bo ta bibando y trese tur zonido bek, e ora ei e sentimentu di relahashon ta regresá. Simplemente asina ta kon memorianan ta traha den e serebro. Por sosodé ku e sentimentu no ta mes fuerte ku originalmente, pero bo a alkansá e kuminsamentu di relahashon. Y esei semper ta mihó ku stress.

3. Duna nifikashon na bo bida

Un pregunta natural bou di hende den kombersashon ta: “kiko ta nifikashon di bida?”.
Hopi hende ta bini ku kontestanan inesperá: tin hende ta usa e palabra “bida” y tin no ta hasi uso di e palabra mes.

E artíkulo aki ta bai tokante di nifikashon. Laga nos sali for di e punto di bista ku bo serebro, teniendo na kuenta tur e eksperenshanan ku bo haña den bida, ta duna nifikashon na bo bida. E nifikashon aki no ta funda y no ta konsekuensha komun di tur kasualidat ku bo a topa den bo bida. Y presisamente pasobra no tin nifikashon fundamental di bida, bo ta liber pa duna e nifikashon ku abo kier na bo bida. Importante ta pa bo haña òf krea un nifikashon ku kual bo ta sintibu bon kuné. Si bo no sintibu bon ku esei bo mester trata na kambia e nifikashon ku bo a duna òf krea pa bo bida.

Tin diferente manera pa kambia e nifikashon di bo bida. Ku téknikanan lo bo ripara ku bo ta bai haña mas grip riba bo serebro y bo emoshonnan ku ántes tabata e kaso, n'e momentu ei bo bista riba bida tambe ta kambia. Un otro manera pa bo kambia e nifikashon di bo bida ta pa skirbi bo mes biografia. Esaki ta un téknika masha kontroversial pasobra den pasado lo ta tin sufisiente figura partikular ku lo a duna hende e rekuerdonan di mas ridíkulo. Bo mester pensa riba e hendenan ku diripiente ta “kòrda” ku nan tabata rehen di UFO, pa bo sa kiko mi kier men.

Pero den bo mes historia tin sufisiente espasio pa interpretashon. E hecho mayor nan di bo bida bo mester mantené nan komo tal, ku esei bo ta laga sufisiente posibilidat habri pa redeskribi un pasado negativo y rekonstruí esaki na un pasado positivo. Segun mi vishon bo pasado lo mester ta asina positivo ku lo bo ripara mesora kon pekuliar bo ta ora bo wak bek den tempu.

2. Traha huntu pa kresementu personal

E añanan benidero lo no ta esnan mas fásil pa tur hende. E aña ku tin den porta aki desempleo lo sigui subi. Tin rísiko ku den fin di 2010 kuminsamentu di 2011 lo sigui un reseshon. Y despues nos lo drenta aña 2012 kaminda ku hopi hende inhustamente lo mira notisia negativo komo e fin di tur tempu ku ta aserkando. Danki dios 2013, komo reakshon ku e fin no ta en realidat e fin, ekonomia lo floresé di nobo y nos lo tin un bon aña.

Importante den tempunan asin’aki di kaida ekonómiko ta pa sòru pa bo tin un ret di famia y di bon amigu. Bo ta mira ku tin hende ta individualisá, tòg tin un kambio den esaki. Kon straño ku e por parse, bo ta mira ku Internèt ta organisando su mes mas y mas segun retnan soshal. Mira kon tin Facebook, Twitter y hopi mas.

Mi idea ta ku e añanan benidero trahamentu huntu lo bira mas y mas importante. Na un banda un ret fuerte ta bon pa por akapará e konsekuenshanan di por ehèmpel un krísis ekonómiko. Di e otro banda pa siña di otro. Mi ta fuertemente konvensí ku no tin un solo manera riba kua bo por solushoná problema y sigui krese. Presisamente lo ta prudente pa investigá pa bo mes kiko ta traha mihó pa bo mes.

Ku bo laga otro hende den bo ret inspirábu lo sòru pa bo tin mas posibilidat y ku esei bo por realisá mas tantu.

1. Unda e aña a bai?

Bon intenshon mas fuerte via imaginashon. Ta kasi tradishon pa na kuminsamentu di aña dediká atenshon na bon intenshon. E ta pas bon serka e temporada di aña. Realidat ta ku muchu hende tin bon intenshon, pero konsekutivamente no sa di realisá nan. E konsekuensha ta presisamente desepshon en bes ku bai mas mihó. Afortunadamente bo por hasi e chèns ku bo bon intenshon por bira realidat ku un ke otro adaptashon.

Primeramente ta bon pa bo enrikesé bo bon intenshon nan ku mas sentido. Na lugá di solamente skirbi un teksto òf pensa, un bon intenshon tin mas impakto riba bo serebro ora ku bo imaginá bo bon intenshon. Mira kon bo bida ta kambia despues ku bo bon intenshon bira realidat. Kon lo bo ta, kon lo bo komportá bo mes i kon otronan lo atendé ku bo. Imagináb’e mas bunita posibel i duna bo imaginashon espasio pa traha!

Ta un pika pa priva bo mes, dor di bo pensamentu inhustu, di kiko ta realisabel òf realístiko. Ta kos pa bo tin un imágen ku bo serebro ta bira asina entusiasmá ku e ke hasi tur kos ku ta nesesario pa hasi e imágen realidat. Ekspandé e imágen ku zonido i sentimentu. Kiko bo ta tende bo mes bisa i pensa. Kiko otro hende ta bisabu i kiko nan ta pensa di bo sin bisabu. Kon bo ta sinti bo mes i kon bo ta laga otro hende sinti. I un bes mas imaginábu esaki di e manera di mas bunita ku por ta posibel.

Na momentu ku bo gara e imágen, zonidu i sentimentu, hasié mas bunita ainda dor di alegrá e kolo, hasié mas kla òf mas kalido. Hasi e imágen mas i mas grandi. Transformá e estatua den un sorto di pelíkula di futuro den kual bo ta mira kon bunita e ta bira. Sòru pa e bira un “feel-good-movie” ku bo mes komo protagonista.

Pa klousura: duna bo mes espasio amplio. Na lugá di mester realisá tur kos fin di yanüari, ta mihó duna bo mes hinter aña. Sòru pa bo posishoná e imágen ariba menshoná asina den tempu ku bo ta mira bo mes fin di desèmber 2010. Di e sistema ei bo ta duna bo mes e tempu espasioso pa realisá bo bon intenshon ku pleizi i na un manera relahá.

Mi sa ku siguransa ku na momentu ku riba dia 31 di desèmber aña 2010 bo realisá tur bo bon intenshon nan ku lo bo ta mas ku satisfecho ku bo mes.

Unda e aña a bai? Un aña mas a pasa i otro ta den kuminsá. Mi ta spera ku 2010 ta un aña bon sin ningun miedu!

Bon aña, mi ta deseábu de lo mehor!
iMo