2. Bai trabou ku pleizi

Den e siman di 8 di yanüari 2007 mi a bai trabou atrobe despues di un fakansi bon meresí i m’a gara mi mes riba e hecho ku mi mester a kustumbrá pa bai trabou atrobe. Indudablemente bo sa eksperensha djaluna mainta despues di fakansi òf wikènt e sentimentu ku e fakansi òf e wikènt por a dura un tiki mas. E sentimentu ei tabata iritámi pasobra e no ta pas ku mi.
Danki dios, despues di e promé oranan na trabou mi ta tin un sentimentu hinteramente otro. E promé dia aki tabata asina ameno ku ma kustumbrá mes ora. Kasi mi no por a warda pa e siguiente dia yega. Awor no ta e intenshon pa tur hende bai hasi e trabou ku ami ta hasi, komo kolaboradó di rekursonan humano, pero ta importante pa haña e trabou kaminda ku bo ta sinti bo mes bon.
Nos tur lo ta mas salú den añanan benidero pasobra medisina lo bai dirigí su mes mas i mas riba prevení ku riba kura. Dor di deskubrí problemanan potensial den un estado tempran nan lo wòrdu solushoná promé ku bo bai haña molèster di nan. Probablemente nos lo traha mas largu pasobra nos lo tin un kondishon físiko i spiritual mas mihó. P’esei ta bira hopi importante pa bo tin òf haña e trabou ku realmente bo ta gusta.
Den esei ta hopi importante pa e esfera di trabou tambe ta bon. Ningun hende lo no gusta pa traha den un grupo di hende krepchi ku mal beis. Di otro banda si bo tin un tim entusiasmá ta hopi plasentero. Hende ta influensia otro inkonsiente. Bo ta mira esaki mas fuerte na momentu ku bo tin un persona ku ta sinti su mes rékete malu e ta daña e esfera pa tur hende.
Ounke mayoria hende no ta eksperensia esei, por resultá kontrali tambe, es desir, ku un persona ku ta sinti su mes rékete bon ta logra netamente hisa e moral di e grupo.
Esei ta un di e karakterístikanan mas importante di liderazgo. En efekto ta solamente un kuestion di sende e sentimentu korekto den bo mes i sòru pa abo sinti bo mes mas fuerte ku e otro hendenan den bo serkania. Di sigur nan lo kopia bo aktitut. Purb'é i lagami sa.

1. (Mal) Bon Intenshon

Atrobe nos ta den e temporada di aña ku hende ta hasi “bon intenshon”. Na hulandes e asina yamá goede voornemens. Personalmente mi no por wanta bon intenshon. Aun mas pa motibu ku den e palabra kasi ta insinuá ku lo bo no bai tene bo mes na nan. “Mi tin e intenshon di stòp di huma” ta zona por ehèmpel hopi otro for di “Mi ta òf a stòp di huma” òf mihó ainda “M’a stòp di huma pa restu di mi bida”. Pero los for di e kontenido ta prinsipalmente e forma ku ta robes. Mayoria hende no ta wòrdu motivá pa propósitonan manera ariba menshoná. Banda di metanan konsiente hende tin metanan inkonsiente tambe. I tanten bo no haña e metanan inkonsiente aki tambe riba un liña bo metanan konsiente lo kambia masha poko. Pa e motibu ei mi ta papia di “(mal) bon intenshon”.Sin embargo tin un manera tambe pa duna bo mes e oportunidat máksimo pa hasi e aña nobo un gran éksito, esta e poder di imaginashon.

Si bo ke pa 2007 bira un aña bunita pa bo, lo yuda pa di antemano bo imaginábu kon 2007 lo bai ta pa bo. Kuminsá na e final. Imaginábu ta selebrá aña nobo den fin di 2007. Kiko lo bo a realisá kaba? Personalmente lo mi kuminsá ku salú. Imaginábu si den fin di 2007 lo bo tabata mas salú: kon esei lo ta? Sigui ku amor. Si bo tin un bon pareha kaba, imaginábu kon haltu boso dos lo tin e yama di amor ta kima den fin di 2007. Si bo no tin pareha ainda, òf bo ta deseá un otro, imaginábu ku na fin di 2007 lo bo ta riba e kaminda pa topa unu. Sigui despues ku kada un di bo metanan personal.

Amplia e imágen aki agregando tur otro hende ku bo ta stima anto mira mehorashon den bo kas, bo relashon òf na trabou. Mas detayá bo imaginashon ta mas grandi e chèns pa bo logra ta bira. Despues bo ta pensa kiko bo mester alkansá mei mei di aña pa bo realisá e imágen di fin di 2007. Imaginábu un biaha mas kon esaki lo ta.

Hasi e mesun ehersisio pero pa kuminsamentu di 2007: kiko tur mester kambia den kuminsamentu di 2007 pa realisá e imágen di mei mei di 2007.Kiko mester sosodé medio febrüari 2007? Kiko na fin di yanüari?Kiko lo bo por hasi den e promé siman di yanüari 2007 pa bo realisá e imágen di fin di aña 2007?Ku otro palabra: loke bo mester hasi ta pensa kiko bo kier realisá na fin di aña anto despues bo ta traha bai bek na presente dor di kada bes dividí e tempu na dos i imaginábu kiko lo bo a realisá kaba.

Dor di visualisá esaki bo ta komuniká e mensahe na bo subkonsiente di manera ku lo bo dirigí bo mes, na un manera relahá i kasi outomátiko, den e aña benidero pa alkansá bo metanan.

Mi ta spera tambe ku, na fin di 2007, ora nos mira bek riba e periodo aki ku bo tin enbèrdat e salu, amor, kariño, trankilidat, pas mental i satisfakshon laboral ku bo a imaginábu awe.Pues na un manera relahá, pero ku forsa i siguransa bo por kuminsá deskubrí kuantu plaser i sentido di humor e aña aki lo trese pa bo. Mi ta deseábu de lo mehor pa e aña nobo.