12. E benefisio di “worst case planning”

E ta zona un tiki nèt kontrali di pensa positivo? Esei no ta kompletamente bèrdat pasobra e ta bai mas pa bo sinti bu bon ku pa bo pensa positivo. Kiko ta pone algu ta zona negativo manera “worst case planning” pa den kuadro di algu positivo. Esei mi ta bai purba di splika.

Pa por komprondé esaki bon ta di importansia pa wak e papel di presente. “Worst case planning” ta trata opviamente futuro. Pero e promé pregunta ku bo mester hasi bo mes ta: “Bo mester prekupá ku futuro?” Pasobra di un manera gran parti di bo bida mester trata di sintibu bon den presente. Esei ta mas importante ku plania un bida fantástiko i eksitoso.

Laga nos sali for di e punto di bista ku bo ta sinti bo mes bastante bon pa organisá sobrá di bo bida. Pasobra solamente si bo ta sinti bo mes bon den presente e ora ei mi ta pensa ku ta sensato pa plania bo futuro tambe. Prinsipalmente pa e hecho ku bo ta saka mas di bida ku ora bo sinta warda pasivo riba kiko lo sosodé ku bo.

Mi tin ideanan kla tokante di esei. Bo ta plania bo futuro den imágen di sistema ku bo supkonsiente sa kiko ta e intenshon i, hinter dia ku yen desishon chikí chikí, por realisá esaki. E eskoho ku bo ta hasi pa loke ta trata bo mes tokante e imaginashon di bo futuro, bo mester stipulá hasiendo uso di “worst case planning”. Si bo ta plania, imaginábu e kos di mas pió ku lo por pasa. Un plan ta un bon plan ora bo por ta satisfecho ku e resultado di mas pió.

Lagami ripití esaki den detaye, pasobra mi eksperensha ta ku mayoria di hende falta e “clou” ora nan tende e kos aki pa promé biaha. Loke bo mester hasi, ta ku e pió senario di bo plannan, ta asina grasioso ku apesar di esaki lo bo kier hasié ku grasia. “Wort case planning” no ta nifiká mas ku e pió senario ku bo por imaginábu. Esei no nesesariamente ta negativo. Un bon plan tin un bon resultado hasta na e pió senario ku bo pensa. Imaginábu ku bo ke kuminsá ku un negoshi, imaginábu e pió senario ku lo e no resultá, pero ku lo bo por drenta servisio di bo kliente di mas grandi, e ora ei e ta un bon plan. Ainda teniendo kuenta ku un mal resultado e ta bon tòg. Di e sistema ei “worst case planning” ta pas perfektamente den pensamentu positivo i tambe sintibu bon.

11. Kos lo drecha

Esun krísis despues di e otro ta lora riba e pantaya di televishon. Si ta trata un krísis di alimento, di envehesimentu, e krísis di energia òf e reseshon ekonómiko. Media tin semper mas atenshon pa notisia negativo ku pa notisia positivo. Dor di e konstrukshon di nos serebro mayoria hende ta wòri mas ku e historianan aki ku ta bon pa nan. P'esei ma pensa pa awe laga tende un zonido kontrali. Pasobra kada krísis tin e simianan pa desaroyo nobo i mihó den dje.

Tuma por ehèmpel e promé reseshon ekonómiko na Hulanda. Sigur no, kos ta bai ménos bon aya tambe. Pero hasta ora tin un kontrakshon ekonómiko di 3-5% den e próksimo añanan ainda e ekonomia na Hulanda lo tin shen di mil mion di euro den sirkulashon. Hende ménos pudiente lo bai tin e mas pisá. Sobra di hende relativamente lo no ripara mashá. Pero lo bini tambe posibilidatnan grandi pa kresementu. Teknologianan Bio i Nano lo sòru den e próksimo dékadanan pa un prosperidat inkomparabel. Djis pensa bek na añanan 80 anto na kon bon nos tin e awendia.

Krudo no ta kaba nunka. Solamente e ta birando impagabel. Pero esei ta habri kaminda pa fuentenan di energia nobo. Esakinan lo ta mas limpi, mas barata i safe ku loke nos ta usa awendia. Transporte públiko lo mehorá i amplia den ekstenso. Preisnan haltu pa kuminda lo ofresé chènsnan grandi na por ehèmpel Afrika pa desaroyá su mes. Despues di e aparishon di Asia i Sur-Amerika, e situashon na Afrika tambe lo mehorá. Envehesimentu lo sòru pa tin mas i mas adelanto riba tereno di kuido i medisina dor di kua nos tur lo por bira mas bieu den mas mihó kondishon.

Pa ta korto, no opstante tur atenshon pa e negativo, e desaroyonan positivo ta mas fuerte i imparabel. Tòg bo por sòru tambe ku bo ta sali mihó for di un krísis. Den tempu di inseguridat sòru pa bo desaroyá abilidatnan personal. Sea loke pasa bo ta mantené esakinan pa restu di bo bida.

10. Un bida signifikativo

Ku e elekshon históriko di Barack Obama nèt tras di lomba, bo ta mira un biaha mas kon lihé kambio por tuma lugá. Maske tin bastante motibu pa prekupashon, tin kada bes mas desaroyo ku den un palabra por yama nan positivo. Esei ta great, pasobra tin bastante hende ku ta mira bida komo insignifikante i p'esei ta biba pa loko. Loke mi ke bisabu ta ku ta bai pa libertat mi no ke bisabu kon bo mester biba bo bida. Kada manera den kua bo no ta afektá otro hende ta estupendo.

Tòg tin algun tep di kua ta e mihó manera pa bo organisá bo bida. Nos serebro ta organisá pa mira sierto aktividat komo strès i tenshon i otronan aktividatnan na un manera relahante. A base di e pensamentu ei bo por organisá bo bida di sistema ku bo ta sintibu bon ku esei.
Un di e karakterístikanan den kua nos serebro ta bon, ta duna kontenido na mundu. Nos ta deskubrí dia pa dia mas regular ku mas bestia tin konsiente ku nos tabata pensa. Tantu bestia ta prueba di tin noshon di na mes i por ehèmpel por tene kuenta ku futuro. Esei ta laga intakto ku nan ta duna masha tiki nifikashon na nan mundu kontrali na e ser humano.

Ya for di tempu di pre-historia e ser humano a duna nifikashon na su eksistensha. Si ta trata piramide na Egipto, òf tèmpel na Sur-Amerika, pa duna algun ehèmpel, e ser humano semper tabata en buska di kontenido i nifikashon. Probablemente tin un bentaha evolushonario den religion i spiritualismo. I e bentaha aki a sòru pa e ser humano a konstruí un sivilisashon semehante.

E bista sientífiko di mundu di un òf otro manera a deskubrí basta di e sorto di nifikashon nan aki i di trese nan bek na e naturalesa normal. Esei no ta kita ku nos serebro ta sinti su mes bon te ainda ku spiritualismo i ku bo por saka bentaha for di dje. Pa boso ku ya tin un òf otro forma di spiritualismo den nan bida esei ta kla, pero si esei no ta e kaso, e ora ei mi ta partidario pa bo krea òf haña un sistema pa bo mes den kual bo ta sinti bo mes bon.

9. Skohe bo amigunan kuidadosamente

Manera boso a spera, un hende mester hasi basta esfuerso pa e pèrtenesé na mi sírkulo di amigu. No solamente na prinsipio pero tambe durante e amistat mi ta basta severo den evaluá si tur kos ta kuadra. Mi eksperensha ta ku amigunan robes bo ta hañabu ku basta desilushon. Pa ami amistat ta nifiká kalor, amor i energia kompartí di sistema ku nos ta siña di otro. Si mi tin e idea ku e amistat ta karesé na esaki e persona ta disparsé hopi lihé den background.

Bo ta haña esei kruel? Mi no ta kere. Na promé lugá bo mester resolvé bo mes kosnan i sòru pa bo sinti bo mes bon den bo kueru. Despues di esei ta e kaso di ta alerta pa no tin disturbio den bo ambiente direkto. Si esei ta e kaso, lo ta bon pa bo bisa esei. E mihó manera pa hasi esei ta pa tene tur kos pa bo mes i enbolbí bo mes den esei. Imaginábu bo tin un hende den bo ambiente serkano ku ta hasi algu ferfelu, e ora ei ta bon pa bo papia di e kos na e siguiente manera. “Si bo ta hasi x kos, e ta molostiámi/mi ta rabia òf mi ta desilushoná etc.”

Aki ta trata pa bo laga komprondé ku e komportashon di e otro tin konsekuensha negativo pa bo estado emoshonal. Mayoria hende ke bu bon i ta spanta di un remarke asina. Dor di e spantu nan ta adaptá nan kondukta di sistema ku u siguiente biaha ta bai mihó. Esei ta kai bou di e titulo di “Eduká bo amigunan”. Tin biaha un hende ta reakshoná ku un remarke ku e intenshon pa molostiábu. Hende asina bo mester saka hopi lihé for di bo mundu, pasobra ta desilushon so nan ta trese.

Awor e situashon naturalmente ta ku nèt e hendenan ku ta mas serka di bo òf ku ta famia, ta hasi òf bisa kosnan ferfelu. Pa nan tin un otro pregunta, kual ta: “Mi ta asina importante pa bo ku mi tin ku kambia?” Un pregunta asina bo mester kontesta ku “si”. Si tòg un hende ta bisa “no”, tira e persona ei for di bo bida maske bo ta asina close ku e persona ei. Hende tin tempu limitá i por atendé ku un grupito di hende chikí. Sòru pa bo grupo di hende sostené otro i abo, entusiasmábu, dunabu energia i gewon care pa otro. Esei ta un di e pasonan mas lihé na un mihó bida.

8. Rebibá bo fakansi

Pa mayoria hende fakansi a pasa. Un par di dia mas i mi tambe mester bolbe bai laborá. Tòg ta agradabel pa pensa ku regularidat bek riba e fakansi ku a pasa. Den kaso ku bo a eksperenshá kosnan prèt. Si bo no a bai ku fakansi e ora ei lo tin rekuerdonan na otro fakansi ku bo por trese bèk.

Mi mes a bai Europa. Na Hulanda ma keda serka amigunan ku te ainda ta biba na Breda e siudat kaminda mi a studia i biba. Un siudat chikí ku un ambiente masha kalido. Tambe ma bai bishita mi subrino ku a bai studia e aña aki i ta bibando na Rotterdam. Bon manera bo sa un di mi hòbinan ta shòp i maske ku kosnan tabata hopi karu, mirando ku ta Euro ta manda na Europa, ma pasa bon.

Den pensamentu mi por rebibí hinter e fakansi. E buelo di nuebe ora, e kanamentu na Antwerpen, warda riba trein i e preisnan karu di e sapatunan. Paso a paso mi ta mira e film mi dilanti. Dor di rebibá kon e bista tabata, kua holó ma sinti (haring) riba “markt”, kua zonido mi a tende, kòmbersashonnan ku nos tabata tin, kon nos a hari, e bon sentimentu di e fakansi ta bini bek. A la fin regresá bek den hinter un otro mundu bek na Kòrsou.

Asina e serebro ta traha. Nos serebro ta manera un bio kòmpiuter ku ta prosesá informashon di sentimentu. Dor ku bo sintínan no por paga (si bo sera bo wowo bo ta mira skur so) e informashon ta ser prosesá dor di bo serebro. Ku e konsekuensha ku ora bo bolbe imaginábu unda bo tabata, bo trese bek e zonidunan i imágennan, e ora ei e sentimentu bon ta bini bek.

Aworakí kaba mi por mira riba e kalènder i mira ku e periodo di sèptèmber te ku desèmber ta trabou duru lo tin. Esei no ta problema, mirando ku mi ta bai kambia di trabou, mi ta gusta esei. Tòg lo mi tene un pousa ku regularidat i konsientemente bai bek na e bunita fakansi na Europa i trese bek e bon sentimentu pa gosa di dje. Maske ku mi ta den otro sirkunstansha i tambe na un otro lugá, den pensamentu mi por kambia di lugá bai kaminda mi ke i finalmente ta esei ta tur kos.

Algun hende ta ménos bon den imaginashon, òf di trese bek zonido, legumai holó. Maske ku e regla ta ku mas tantu informashon di sentido bo tin, mas fuerte bo ta trese bèk e sentimentu, tòg ta asina ku ta paso a paso bo por trese bek e bon sentimentu di pasado.

7. E benefisio di problema

Den e siman ku a pasa mi a haña un pregunta interesante: "ku mi ta
kere ku por evitá depreshon". E kontesta kòrtiku ku ma duna ta: Si!
Si bo sa kua téknika bo mester apliká. Lástimamente e téknikanan aki no ta forma parti di enseñansa di fundeshi. Tin diferente manual ku téknika pa bo dirigí bo serebro mas efisiente.

Pero e imágen ta mas kompliká, pasombra si akaso mayoria hende no siña e téknikanan aki na tempu, bo por sali for di e punto di bista ku bo no por hasi nada na momentu ku bo serebro komportá su mes na un manera problemátiko.

Mi ta kòrda bon kla kon na edat di 30 aña pa promé biaha mi a siña e téknikanan aki, mes ora mi a pensa: “Esaki mi mester a siña na edat di 15 aña; lo mi por a evitá hopi desilushon pa ku mi mayornan, amigunan pero lo mi por a evitá prinsipalmente desilushoná e gainan”.
E persona ku a hasimi e pregunta ariba menshoná a bisami ku e ta yalurs ku mi a siña e téknikanan milagroso na edat asina hóben. E ta tin 55 aña ora ku pa promé biaha el a siña sinti su mes bon djis pa numa.

Kon straño e por zona, mayoria biaha ta mihó si un hende eksperensha problemanan manera angustia, depreshon òf rabia, pasobra nan ta mekanismo di sobrebibensia hopi profundo.
Bo subkonsiente te skohe pa un strategia di sobrebibensia den tempu di pèrta pa sobrebibí. E hecho ku hende ta haña nan mes den problema, ta nifiká sobrebibí.

E úniko desbentaha ta ku asina e subkonsiente ripara e manera di funshoná di un strategia pa sobrebibí, e ta bai mara su mes na dje, i ku lo bo mester di téknikanan spesial pa konvensé e subkonsiente pa mustra un komportashon mas efisiente.